خبير: الوضع الاقتصادى صعب والقادم أسوأ..وعلى المصريين الاستعداد له

- ‎فيتقارير

كتب- عبد الله سلامة

أكد الخبير الاقتصادي عمر الشنيطي أن الفترة المقبلة ستكون صعبة للغاية من الناحية الاقتصادية، مطالبا الأسر المصرية بالاستعداد جيدا.

وكتب الشنيطي- عبر صفحته على فيسبوك، تحت عنوان "نصيحة للعائلات المصرية"- "الفترة اللي جايه هتكون صعبة جدا من الناحية الاقتصادية.. مستويات ارتفاع الأسعار هتكون غير مسبوقة.. الناس دلوقتي بتشتكي من الأسعار ومتصورة إن اللي حصل في آخر كام شهر ده جنان، لكن للأسف الفترة اللي جايه هتكون أسوأ مع القرارات المرتبطة بقرض صندوق النقد اللي أصبح لا مفر منه.. الكلام ده هيأثر على القوة الشرائية للناس اللي هتنخفض بشدة أكتر من الوضع الحالي".

وأضاف الشنيطي "للأسف كتير من الرجالة في مجتمعنا بياخدوا الموضوع على صدرهم، ومن القرف يطلعوا الكلام ده على بيوتهم وولادهم، وده هيكون سبب لحالات انفصال ومشاكل أسرية من القرف وضيق الحال.. الراجل العاقل هو اللي يجيب مراته وولاده ويفهمهم الوضع ويقعد يفكر معاهم إزاي يقللوا المصاريف بشكل عام".

وتابع الشنيطي، قائلا: "مش عيب إن الراجل يدور على شغل تاني جنب شغله الأساسي، حتى لو الشغل ده يبدو أقل في المكانة الاجتماعية من وظيفته الأساسية.. ومش عيب كمان إن الست اللي قاعدة في البيت تحاول تشتغل أي شغلانة، وكمان مش عيب إن الأولاد اللي في الجامعة سواء ولاد أو بنات يحاولوا يشتغلوا عشان يساهموا في البيت حتى لو بمبلغ بسيط".

واختتم قائلا: "الفترة اللي جايه هتكون صعبة على الكل، والأفضل إن الناس تدرك ده وتستعد له، بدل ما تصب قرفها من ضيق الحال على بيوتها وولادها".