كتب أحمدي البنهاوي:
قررت مروة قناوي والدة الطفل يوسف الذي قتلته رصاصة مسدس نقيب شرطة الانقلاب طاهر محمد أبوطالب وأطلقها خالد نجل "النائب" بـ"برلمان" العسكر أحمد عبدالتواب في 30 مايو الماضي، التظاهر و10 من صديقاتها أمام مقر "برلمان" العسكر، أمس الثلاثاء، مطالبة بحق ابنها في تقديم الجناة للعدالة، وتوفير محاكمة عادلة وناجزة للقتلة، وتجريم استخدام السلاح وسط المناطق السكنية غير للدفاع عن النفس.
وقال الناشط محمد غنيم تعليقا على الوقفة التي سجلتها عدسات النشطاء "من ٤ شهور ولد واقف مع اصحابه في الشارع. ناس معزومين في فرح جنبهم. واحد فيهم طلع طبنجة. وابتدوا يضربوا نار. بيحتفلوا. رصاصة جت في الولد. الولد مات.
اتضح ان الطبنجة ملك نقيب شرطة. وان اللي ضرب نار طالب ابن نائب في البرلمان. المحامي العام اصدر قرار بالظبط والاحضار علشان يتحقق معاهم. ولغاية النهاردة الشرطة لا جابت الظابط ولا ابن النائب.
وأردف: "أم الولد عايزة حق ابنها. بتطلب ان اللي قتله يتحاسب. بالقانون. في محاكمة عادلة. بعد ما استنت شهور من غير ما حاجة تحصل قررت النهاردة انها مابقتش قادرة تسكت. قررت تقف قدام البرلمان وتشيل صور اللي قتلوا ابنها. علشان تفكر الناس انهم لسة احرار وماحدش حاسبهم ولا حتى حقق معاهم.. قدمت في القسم على تصريح علشان ماتخرقش قانون التظاهر. المحكمة رفضت تديلها تصريح. طلبت من الناس تنزل معاها. الناس خافت على نفسها.
وبرضة نزلت. ونزلوا معاها عشر ستات.. اجدع من كل رجالة البلد..احنا آسفين يا مروة. آسفين يا ست الكل".
القدر والقصاص
وكتب مروة قناوي عبر حسابها على فيس بوك: "كتير بيعتبروا اننا مخيرين ما بين الرضا بالقدر وبين القصاص..
راضيين بكل حاجة لان اللي كان هيحصل أكيد اسوأ وأكيد ده السيناريو الأفضل على الإطلاق لكن هوة ليه حصل وليه في قصاص مادام هوة قدر؟".
لأن ساعات في رسالة إلى أنه في حاجة غلط ولازم تتصلح للأسف هيكون في ضحية علشان توصل الرسالة والضحية أبدا مش طفل مات غدر يقينا هوة في أحسن مكان قلبه أتعلق بيه وأكيد بيلعب كورة وبيتعلم كل يوم أكيد هيفاجأنا لما نقابله أنه بقا أحسن لعيب في العالم وحقق انتصارات كتيرة هيحكيلنا عنها لما يحين المعاد).
لكن الضحية هنا هي اللي عاش وساب ابنه يروح وهوة بيتفرج وعاجز أنه يوهبه الحياة. القصاص مقترن بالرضا علشان الضحية متكونش دفعت التمن من غير ما توصل الرسالة أكيد مش طبيعي طفل بيلعب مع صحابه تجيله طلقه تنهي حياته أكيد في حاجة غلط!
في ناس مسكت سلاح و استهتروا بروح! في ناس عرفوا انهم اتسببوا في روح ام راحت منها و قرروا يستعملوا نفوذهم و يهربوا! في ناس ساعدت في التستر على المتهمين!
النهارده كل اللي عايز يقول معايا انه في حاجة غلط الساعة 5 عند مجلس الشعب هنقولهم في حاجة غلط!!
تاني بأكد تم إخطار الجهات المعنية بالوقفة وتم إنذاري بالرفض (قلك مجلس الشعب ممنوع الشعب يقف قدامه)!
